Chairman's introdiuction 2026 in Cornish

Dynnargh dhe’n 67ves Gool Ilow Hav omma yn S Endelyens. Dell veu golowboyntys y’n gool warlena, hevlena ni a dhynnargh Paul Daniel avel agan Kevarwodher Awenek nowydh. Paul a dheuth dhe’n gool yn kynsa nans yw lies bledhen avel pianydh, hag ena yn 2023 dehweles a wrug avel hembrenkyas, may ledyas ev performyans dramasek hag amovyansek a Ruvaneth Elgar. An vledhen a sewyas, ev a hembronkas Kangavow Almaynek Brahms, hag ena warlena performyans anankovadow a Falstaff. Hevlena ev a wra kowlomri avel Kevarwodher Awenek; hag y lavarav “kowl” drefen ev dhe bonya a-gynsow y gynsa hanter marathon, yn-dann guntel arghans rag an gool – nyns yw hemma yn desskrifans an soodh, my a’gas afydh!

Dres nebes bledhynnyow lemmyn ni re’gan beu omgemeryans dhe gomprehendya moy ilewydhyon yowynk y’n rol a berformyoryon a’n gool. Ni a omglew may prov an golyow Endelyens fordh unnik rag performyoryon yowynk dhe gemeres rann yn ilow, keffrys ha’n kettestennow socyal ha spyrysel a’n gool hag a synsyn a’n keth posekter.

Dell wor lies ahanowgh, yma le a  jonsyow rag tus yowynk dhe wari ilow y’n RU, ha ni a vynn defia an tuedh na.

Warlena a welas an kynsa bledhen a gesoberyans gans Penneglos Truru yn Falstaff, ha ni a vydh ow tastynerghi an ganoryon yn diw dowlen, keffrys ha kanoryon dhyworth an Keuryow Yowynkneth Kernow a wra agan junya yn Turandot. Keffrys ha henna, ni a vydh ow tyghtya agan towlen-ystyn gemeneth arta, hag ynni y teu gwarioryon gorden yowynk dhe berformya yn S Endelyens yn-dann withans nebes a’gan gwarioryon meur aga prow (neb a ri yn hel nebes termyn rydh a’ga rol ober bysi).

Paul re dhrehevis war berformyans warlena Dido hag Aeneas dre dowlenna hevlena devynnow dhyworth Myghternes an Spyrysyon gans Purcell, hag a ri arta chons splann rag kanoryon yowynka – lies anedha a studh orth kollji ilow – dhe berformya rannow aga honan. Ni re dhasfurvyas ynwedh an fordh may charjyn feow dh’agan kevrenogyon, may hyll an re a’s teves edhom a’y wul a yll kemeres rann y’n gool orth pris isella. Ni a veder dre an musuryow ma dhe genertha moy performyoryon ilowek roasek, ha pesya kavos govenek may hwra an diwysyans ledanna kavos unn jydh an keth par a skoodhyans a dhegemeryn ahanowgh, agan goslowysi ger, dre argevrohow ha ragbrenow dhe’n dowlen Kowetha.

My a wayt hwi dhe omlowenhe oll y’gan beu dhe offra hevlena ha ri gras dhywgh unweyth arta, rag agas kerensa ha skoodhyans a wra oll a hemma galladow.

Treylys gans Steve Harris  |  Translated by Steve Harris